उ बोल्यो

उ बोल्यो,

एउटा यात्रा हानि दिउँ

गन्तव्य विनाको

मैले नकारे

मलाइ जीवनको धाउन्न थियो

उ बोल्यो

एकछिन सुस्ताइ दिउ टक्क

मस्ताइदीउ बेहोसीमा

मैले हकारे

मलाइ पिउन आउन्न थियो

उ बोल्यो

सपनामा जीवन भर्यौ कि

बिपना यथार्थ लागोस्

मैले लकारे

मेरो आँखाले सपना देख्न भ्याउन्न थियो

उ बोल्यो

भावनालाई गीत बनाइ दिउ

जीवनलाई शब्दमा समेटेर

मैले झकारे

मेरा ओठले गीत गाउन्न थियो

उ बोल्यो

अन्तिम शब्द बिदाइमा

सपनाको सहरमा महल ढड्याउन

मैले सकारे

तर सोध्न सकिन तिमीलाई माया लाउन्न थियो ?